Sjøgrens survey 2026

Kjære moglege deltakar,

Du er invitert til å delta i ei undersøking som legemiddelselskapet Novartis gjennomfører i samarbeid med NRF Sjøgrens.

Vi inviterer deg til å delta i ei nettbasert undersøking. Målet er å finne ut meir om erfaringane dine med Sjøgrens sjukdom, inkludert symptombyrde, behandlingsbehov, behandlingsopplevingar og bruk av helsetenester. Under finn du ei kort oppsummering av informasjonen i dette samtykket.

Korleis dataa du oppgir, blir behandla
Informasjonen du oppgir, vil vere anonym og konfidensiell. Vi vil aldri samle inn eller bruke data i resultata frå undersøkinga som kan identifisere nokon deltakarar. Alle data som blir samla inn som ein del av denne undersøkinga, vil bli behandla og lagra i samsvar med personvernlovgivinga. Ver merksam på at formålet med undersøkinga ikkje er å samle inn personopplysningar. Del derfor ikkje personopplysningar som kan identifisere deg i fritekstfelt.

Novartis bestemmer kvifor og korleis dataa dine blir behandla, og er derfor behandlingsansvarleg for dataa. Novartis vil behandle dataa du oppgir. Dette kan være: alder, kjønn, region i Noreg, utdanningsnivå, hushaldsinntekt, hushaldsstorleik, medisinske diagnosar, symptom og symptomgrad, behandlingar du har fått eller får no, bruk av reseptfrie legemiddel eller kosttilskot, tilfredsheit med behandling, etterleving av behandling, biverknader, bruk av helsetenester, reisetid til avtalar og oppbluss knytte til Sjøgrens sjukdom («dataelementa») for formålet med undersøkinga. Resultata vil bli oppsummerte av Novartis i ein rapport som skal delast med NRF Sjøgrens.

Novartis er lovpålagt å registrere alle rapporterte biverknader eller klager (her kalla «biverknader») som er knytte til produkta sine. Dersom biverknader blir rapporterte i undersøkinga, vil personleg informasjon, inkludert opplysningar om deg og rapporten din om biverknaden, bli registrert elektronisk og behandla for å rapportere biverknaden.

Personopplysningar blir behandla for å oppfylle lovpålagde plikter knytte til legemiddelovervaking, og for analyse og statistiske utrekningar i samband med overvaking av legemiddel/medisinsk utstyr. Opplysningane vil bli lagra i Novartis sin sentrale database. Dei vil berre bli lagra så lenge vi meiner det er nødvendig for å oppnå formålet, og så lenge gjeldande lovgiving krev og/eller tillèt det. Alle data vil bli behandla strengt konfidensielt. Dersom ein biverknad blir rapportert, kan dataa bli overførte til regulerande styresmakter, partnarar og farmasøytiske selskap innanfor eller utanfor EU og EØS, på ein måte som sikrar at konfidensialiteten til dataa og gjeldande krav til personvern blir ivaretekne.

Dersom du ønskjer innsyn i dei registrerte personopplysningane dine eller har spørsmål om korleis Novartis behandlar dataa dine i samband med denne undersøkinga, kan du kontakte personvernkontoret vårt på: dataprivacy.nordics@novartis.com 

NO260820_11768646

Oppsummering av undersøkinga

Kva handlar undersøkinga om? 
Formålet med undersøkinga er å samle inn informasjon frå personar med Sjøgrens sjukdom gjennom eit nettbasert spørjeskjema. Vi ønskjer å forstå meir om erfaringane deira og kva behandlingsbehov dei har. Vi inviterer alle medlemmene i NRF Sjøgrens og følgjarar av NRF Sjøgrens på Facebook til å delta.

Kven betaler for undersøkinga? 
Undersøkinga blir gjennomført av Novartis, eit legemiddelselskap (også kalla «sponsor»), som betaler for undersøkinga.

Kva skjer dersom eg deltek i undersøkinga? 
Dersom du deltek, blir du beden om å signere dette samtykkeskjemaet. Då stadfestar du at du har lese og forstått informasjonen, og at du har fått svar på spørsmåla dine. Deretter blir du beden om å svare på eit nettbasert spørjeskjema. Det tek om lag 20 minutt, og du skal berre svare éin gong. Du kan stoppe når som helst i spørjeskjemaet og halde fram seinare dersom du ønskjer det. Du vil framleis få vanleg medisinsk behandling under undersøkinga. Undersøkinga endrar ikkje behandlinga di eller oppfølginga du får frå legen din. Du skal ikkje ta ekstra laboratorieprøver eller gjennomgå medisinske prosedyrar utover det legen din vanlegvis gjer.

Må eg delta i undersøkinga? 
Det er frivillig å delta. Dersom du ikkje ønskjer å delta, treng du ikkje å oppgi nokon grunn. Du kan også avslutte deltakinga når som helst. Du mistar ikkje rett til helsehjelp eller behandling som du har krav på eller allereie får.

Får eg betaling for å delta i undersøkinga? Nei

Kva er moglege fordelar og risikoar ved å delta?
Du får ingen direkte fordel av å delta i undersøkinga, men sponsor kan få ny kunnskap som kan hjelpe forskarar og pasientar i framtida. Det blir ikkje utført medisinske prosedyrar, og undersøkinga endrar ikkje kva legen din meiner er rett behandling for deg. Undersøkinga inneber ingen risiko for fysisk skade. Det kostar deg ingenting å delta.

Kva skjer dersom eg blir skadd på grunn av deltakinga?
Sidan vi berre samlar inn informasjon frå deg gjennom eit spørjeskjema, inneber undersøkinga ingen risiko for fysisk skade. Undersøkinga endrar ikkje kva legen din meiner er rett behandling for deg, og det blir ikkje utført studiespesifikke testar. Sponsor har derfor ikkje planlagt erstatning ved skade.

Kven har rettane til dataa mine?
Novartis er behandlingsansvarleg for dataa og analyserer resultata frå undersøkinga. Resultata blir oppsummerte og anonymiserte før dei blir delte med NRF Sjøgrens. Dei anonymiserte resultata kan brukast av både Novartis og pasientforeininga for å auke kunnskapen om Sjøgrens sjukdom og bidra til betre forståing av pasientane sine behov. Ingen deltakarar vil kunne identifiserast.

Blir opplysningane mine behandla konfidensielt?
Sponsor skal følgje gjeldande lover for å sikre at identiteten din blir halden konfidensiell. Forskinga skal følgje personvernforordninga (EU) 2016/679 (GDPR) og gjeldande personvernlovgiving. Det rettslege grunnlaget for behandling av dataa dine er samtykket ditt.

Kva skjer med resultata etter undersøkinga?
Resultata frå undersøkinga skal bidra til å beskrive den samla belastninga ved Sjøgrens sjukdom og til å identifisere udekte behov blant personar som lever med sjukdomen i Noreg. Undersøkinga samlar inn erfaringar frå pasientar om livskvalitet, sjukdomsbyrde, pasientreisa og møtet med helsetenesta. Ho skal også bidra til å synleggjere eventuelle gap mellom pasientane sine erfaringar og korleis symptom og sjukdomsbyrde blir forstått og følgde opp i helsetenesta.
Resultata blir analyserte av Novartis og delte i oppsummert og anonymisert form med NRF Sjøgrens. Resultata kan bli formidla gjennom vitskaplege publikasjonar, presentasjonar og dialog med relevante interessentar, som helsepersonell, myndigheiter og pasientmiljø. Målet er å auke kunnskapen om behova og utfordringane til personar med Sjøgrens sjukdom og å støtte framtidige initiativ som kan bidra til betre medvit, oppfølging og pasientrelevante forbetringar. Ingen deltakarar vil kunne identifiserast i publiserte resultat

Vi veit at tida di er verdifull. Vi takkar deg på førehand for tida di og for interessa for undersøkinga.