Eich Dyffryn, Eich Llais – Arolwg Addysg

Mae Dyffryn Clywedog yn Wrecsam yn arwyddocaol am ei dreftadaeth ddiwydiannol a naturiol. Mae’n cynnwys hen safleoedd diwydiannol o bwysigrwydd cenedlaethol gan gynnwys Chwarel y Mwynglawdd, Pyllau Plwm y Mwynglawdd, Melin y Nant, Gwaith Haearn y Bers a Melin y Brenin.

Mae’r dyffryn hefyd yn gartref i gynefinoedd naturiol a safleoedd bywyd gwyllt gan gynnwys Ardal o Harddwch Naturiol Eithriadol (AHNE) Mynydd y Mwynglawdd, Chwarel y Mwynglawdd, coetir hynafol Plas Power, Parc Gwledig Erddig ac afon Clywedog ei hun.

Mae Groundwork Gogledd Cymru yn cymryd rôl arweinol ar ran Partneriaeth Dyffryn Clywedog i ddatblygu cynlluniau er mwyn ennyn diddordeb pobl yn y safleoedd treftadaeth hyn a’u gwella mewn gwahanol ffyrdd, gan gynnwys llunio rhaglenni addysg newydd yn seiliedig ar y dreftadaeth adeiledig a naturiol.

Gyda chefnogaeth Cronfa Dreftadaeth y Loteri Genedlaethol, mae’r prosiect wedi dechrau ar y cam datblygu i baratoi ar gyfer cais cam 2, a fydd yn arwain at brosiect llawn pedair blynedd o hyd os bydd yn llwyddiannus. Rydym yn awyddus i gael adborth gan ddarparwyr addysg i sicrhau bod eich safbwyntiau yn cael eu hystyried yng nghynlluniau manwl y prosiect.